Vorfundur Félags eldr borgara í Hveragerði 3.maí

Fundarboð á vorfund Félags eldri borgara í
Hveragerði þann 3. maí nk. kl. 16.00.

Kæru félagar!
Hér með boða ég ykkur á vorfund félagsins okkar þann 3. maí 2024 kl. 16 í Þorlákssetri.
Dagskráin verður fjölbreytt, fyrst kynningar á ferðum, bæði um Suðurland, upp á hálendið og jafnvel til Spánar. Einnig verður sagt frá helstu nýjungum sem fyrirhugaðar eru í haust. Fundinum lýkur með heimsókn í Skyrgerðina þar sem boðið verður upp á hressingu.

Með sumarkveðju
Sigurlín Sveinbjarnardóttir, formaður FEB Hveragerði

Vorsöngur og bingó

 

Miðvikudaginn 15. maí halda Hverafuglar kór eldri borgara vor söngskemmtun og bingó
hjá Heilsustofnun NLFÍ í Hveragerði.

Sjá auglýsingu

 

Fréttabréf 3. apríl 2024

Í apríl – maí 2024
Kæru félagar í Félagi eldri borgara í Hveragerði. Hér sendum við ykkur vikudagskrá yfir það sem er í boði núna eftir páska. Námskeiðin eru næstum full, örfá pláss laus í síðustu tíma vatnsleikfimi og yoga í vatni og enn hægt að skrá sig. Sigrún Arndal, tengiliður stjórnar við hópstjóra, hefur talað við alla og það er í heildina gott hljóð í fólki og yfirleitt pláss fyrir fleiri. Það eru miklar hugmyndir komnar fram um hvað má betur fara og er stefnt að fundi með stjórn og hópstjórum til að ákveða hvað við viljum bæta og laga.
Nú er farið að huga að vorferð í maí og er helst rætt um skemmtilega menningar og safnaferð um Suðurland, en þetta verður auglýst sérstaklega. Ákveðið hefur verið að vorfundurinn verði 10. maí en það verður líka auglýst betur síðar.
Eins og fram kemur á vikudagskránni er sú nýjung að á fimmtudögum kl. 13.30 – 15 verður kaffispjall og kannski meðlæti í boði fyrir þá sem vilja kíkja við í Þorlákssetri.
Stjórnarmenn munu kappkosta að mæta til að hitta ykkur og ræða málin. Landsambandið býður upp á stutt fræðsluerindi sem við getum fengið á skjáin hjá okkur ef við viljum. Það tekur í mesta lagi hálftíma og yrði þá kynnt sérstaklega.
Svo dettur okkur kannski í hug eitthvað annað þegar fram líða stundir. En eftir sem áður er aðal málið að hittast og spjalla.
Bestu kveðjur
Sigurlín, formaður

 

 

Aðalfundarboð

Aðalfundarboð í Félagi eldri borgara Hveragerði

16. febrúar 2024 kl. 15 í Þorlákssetri

Dagskrá:
Skipan fundarstjóra og fundarritara
Skýrsla stjórnar um starfsárið 2023
Ársreikningur 2023
Félagsgjöld 2024
Lagabreytingar
Kosningar:
Kosning eins stjórnarmanns til eins árs
Kosning þriggja stjórnarmanna til tveggja ára
Kosning eins varamanns í stjórn til tveggja ára
Kosning tveggja skoðunarmanna til eins árs og eins til vara
Kosning fulltrúa á ársfund Landssambands eldri borgara.
Fimm stjórnarmenn ganga úr stjórn; Daði Ingimundarson, varaformaður, Sigrún Anna Stefánsdóttir, ritari, Steinunn Aldís Helgadóttir, gjaldkeri, Marta Hauksdóttir, meðstjórnandi og Björn Guðjónsson, varamaður. Því þarf að kjósa, fjóra menn í aðalstjórn og einn í varastjórn. Tillaga uppstillingarnefndar hefur síðan 1.2.24 legið fyrir á heimasíðu félagsins, www.hvera.net og á töflu í Þorlákssetri. Einnig er ársreikning félagsins 2023 þar að finna. Vinsamlegast kynnið ykkur þetta vel fyrir aðalfundinn.
Önnur mál: Kolbrún Tanja Eggertsdóttir og Eygló Huld Jóhannesdóttir kynna verkefni sín hjá Hveragerðisbæ og tengingu við Félag eldri borgara.
Kolbrún Ósk Guðmundsdóttir, starfsmaður Félagsins kynnir sig.
Sigurlín Sveinbjarnardóttir, formaður segir frá nokkrum verkefnum framundan.
Að fundi loknum er öllum boðið í kaffiveitingar í Þorlákssetri.

Stjórn Félags eldri borgara í Hveragerði.

Frá uppstillinganefnd

Samkvæmt lögum félagsins, 6. kafla, kemur fram að „tillögur félagsmanna um einstaka menn til stjórnarkjörs skulu berast uppstillingarnefnd eða skrifstofu félagsins minnst fjórum vikum fyrir aðalfund“. Þann 5.12. 23 var auglýsing um þetta send til allra og félagsmenn beðnir að skila tillögum fyrir 19. 1. 24. Ítrekun var send þann 16. 1. 24 en aðalfundur verður þann 16. 2. 24

Stjórn FEBHveragerði/Sigurlín Sveinbjarnardóttir formaður

Uppstillingarnefnd hefur lokið störfum og tilkynnir hér með nöfn þeirra sem hafa boðið sig fram til stjórnarsetu og starfa fyrir Félag eldri borgara í Hveragerði.

Í aðalstjórn:

Til eins árs: Daði Ingimundarson

Til tveggja ára:  Anna Elísabet Ólafsdóttir, Birgir Þórðarson og Kristinn Kristjánsson

Í varastjórn: Ingibjörg Sigrún Guðjónsdóttir

Skoðunarmenn ársreikninga: Hólmfríður Skaftadóttir og Þórdís Magnúsdóttir

Til vara:   Jakob Árnason

Fulltrúar á þing LSEB Tilefndir af stjórn eru formaður, ritari og gjaldkeri

Með kveðju frá uppstillingarnefnd, Eyvindur Bjarnason, Jóna  Einarsdóttir, Sesselja Guðmundsdóttir

Fréttabréf

Fréttabréf Félags eldri borgara í Hveragerði í janúar 2024

Kæru félagar. Gleðilegt nýtt ár og bestu þakkir fyrir liðið ár. Við hvetjum ykkur til að taka þátt í sem flestu sem er í boði í félaginu okkar. Meðfylgjandi er stundatafla vormisseris sem í þetta sinn spannar eitt 10 vikna tímabil. Mánudaginn 22. janúar nk. hefjast námskeiðin og standa fram að páskum. Eftir það hefst ný dagsskrá sem verður auglýst síðar.
Nú eru í boði öll þau námskeið sem hafa gengið vel á undanförnum misserum en hætt hefur verið við þau námskeið sem hafa verið illa sótt. Starfsemi hópanna getur hafist þegar hópstjórar
og félagar óska.
Við skráningu á námskeiðin er notað skráningarkerfið Sportabler sem nú er komin góð reynsla af og flestir ráða við. Skráning hefst mánudaginn 15. janúar nk. kl. 9.00. Þeir sem ekki geta sjálfir skráð sig geta komið á skrifstofu félagsins í Þorlákssetri frá kl. 9-12 mánudaga, þriðjudaga og miðvikudaga og fengið aðstoð hjá Kolbrúnu Ósk Guðmundsdóttur, sem er starfsmaður félagsins í 30% starfi.
Ákveðið hefur verið að niðurgreiðsla félagsins verði áfram 25% og er búið að reikna þann afslátt inn í verðská vorsins. Við kynnum síðar margs konar viðburði s.s. leikhúsferðir, ferðalög, fræðsluerindi, skemmtanir og fleira sem er í undirbúningi.
Nú er verið að undirbúa aðalfund Félags eldri borgara sem verður haldinn þann 16. febrúar 2024 kl. 15 í Þorlákssetri.

F.h. stjórnar: Sigurlín Sveinbjarnardóttir, formaður

Námskeið á vorönn 2024

Vatnsleikfimi er alhliða og góð þjálfun í vatni fyrir allan aldur og hefur lengi verið mjög vinsæl líkamsrækt. Þjálfun í vatni veitir létta og viðráðanlega mótstöðu, eykur vöðvatyrk, styrkir hjarta og lungu, eykur þol og sveigjanleika, lækkar blóðþrýsting og er sérlega holl og skemmtileg samvera með öðru fólki.
Kennari: Rakel Magnúsdóttir
Staður: Baðhúsið Heilsustofnun
Tímabil: 22/1 – 25/3
Hópur 1. Kl: 16:30 – 17:15
Hópur 2. Kl: 17:15 – 18:00
Hópur 3. Kl: 18:00 – 18:45
Fjöldi: 24 í hverjum hópi.
Verð: 8.500

H.A.F. Yoga í vatni
Á námskeiðinu er unnið með yoga stöður í heitari laug þar sem lögð er áhersla á einfaldar flæðisæfingar, öndun og hugleiðslu. Yoga iðkun í vatni slakar og styrkir sérstaklega vel á öllum djúpvöðvum, viðheldur hreyfigetu liða og losar um spennu og streitu. Fljótandi og nærandi slökun í flotbúnaði og hugleiðsla í heitum potti, er í lok hvers tíma.
Kennari: Steinunn Aldís Helgadóttir
Staður: Baðhúsið Heilsustofnun
Tímabil: 25/1 – 21/ 3
Kl: 17:00 – 17:45
Fjöldi: 14
Verð: 12.000
Ef þessi hópur fyllist þá höfum við leyfi fyrir að opna á annan 14 þátttakenda
hóp, á sömu dögum kl: 18:00 – 18:45

Yoga Nidra með tónheilun
Yoga Nidra með tónheilun er hugleiðsluform, þar sem iðkendur liggja á dýnu og látur fara vel um sig undir teppi. Kennarinn leiðir þátttakendur inn í djúpa meðvitaða slökun, þar sem hugurinn er í ástandi líkt og milli svefns og vöku. Í Yoga Nidra gefst tækifæri til að losa um spennu í líkamanum, bæta svefn, lækka blóðþrýsting og styrkja andlegt jafnvægi. Þátttakendur eiga að taka með sér teppi í tímana.
Kennari: Helga Björk Bjarnadóttir
Staður: Kapellan Heilsustofnun
Tímabil: 23/1 – 26/3
Kl: 18:00 – 18:45
Fjöldi: 15
Verð: 9.000

Spænska
Námskeið þetta er sniðið að þeim sem hafa áhuga á spænsku og spænskri menningu, stefna á ferðalög til spænskumælandi landa eða dvelja þar til lengri tíma. Skemmtilegt og fjölbreytt námskeið þar sem grunnurinn að spænsku er byggður upp með fjölbreyttum aðferðum.   Áhersla er lögð á að: læra grunninn í málfræði, skilja einföld samtöl og spurningar, ná samhengi á einföldu prentuðu efni, matseðlum, auglýsingum o.fl  bera fram einfaldar en algengar setningar, heilsa, panta mat, borga í búðum og kynnast spænskri menningu, svo sem tónlist, matarhefðum og hátíðum.
Kennari: Droplaug Guttormsdóttir
Staður: Þorlákssetur
Tímabil: 27/2 – 22/3
Þriðjudaga kl: 17:30 – 19:00 föstudaga kl. 10:30 – 12:00 (þetta er eitt námskeið)
Fjöldi: 10
Verð: 7.500

Nýárskveðja

Smellið á miðja myndina til að stækka hana.

Félagsstörf í forystu í Hveragerði

Félag eldri borgara í Hveragerði hefur í haust kastað sér í djúpu laugina með nýjungar á haustmisseri sem nú hefur komið í ljós að var gæfuspor. Stjórnin hafði frá því sl. vor átt í viðræðum við bæjarstjórann um hvort ekki væri hægt að styðja við félagið með að leggja til starfsmann í hlutastarfi á skrifstofu okkar til aðstoðar við skráningar, tölvuvinnslu, almenna upplýsingagjöf ofl. fyrir félagsmenn. Með kröftugu starfi félagsins síðustu árin hefur allt utanumhald vaxið mjög og lagst þungt á stjórnarmenn sem vinna launalaust. Ákveðið var fyrir haustmisserið að taka í notkun skráningarkerfið Sportabler til að skrá sig á námskeið og viðburði. Þetta er kerfi sem notað er hér fyrir íþróttir og félagsstarf. Þetta var erfitt fyrir marga, sérstaklega þá sem ekki eru vanir snjalltækjanotkun. Stjórnin réði því starfsmann í hlutastarf í einn og hálfan mánuð til að aðstoða við skráningar haustsins.
Nú hefur Bæjarráð Hveragerðisbæjar falið frístundamiðstöðinni Bungubrekku það verkefni að sinna þjónustu og stuðning við Félag eldri borgara i Hveragerði. Frístundamiðstöðin Bungubrekka mun sinna almennri þjónustu við stjórn og félagsmenn, halda utan um skráningarkerfi starfsins og félagatal ásamt því að aðstoða við bókhald og gerð ársreikninga.
Frístundamiðstöðin mun einnig taka markvissan þátt í skipulagningu námskeiða, hópastarf og annara viðburða innan félagsins í samráði með stjórn. Ákveðinn starfsmaður innan Bungubrekku verður sérstakur tengiliður við Félag eldri borgara og verður með fasta viðveru á skrifstofu félagsins og mun ásamt forstöðumanni Bungubrekku sinna verkefnavinnu og tryggja framþróun félagsins. Það sem gerir þessar áætlanir einstaklega spennandi er að Félag eldri borgara í Hveragerði fær ekki aðeins einn starfsmann sér til stuðnings heldur í raun og veru alla frístundamiðstöðina, hennar innviði og mannauð sér til stuðnings. Frístundamiðstöðin Bungubrekku er leiðandi á landsvísu þegar kemur að heildrænu frístundastarfi og var á dögunum tilnefnd til íslensku menntaverðlaunanna fyrir fagmennsku í frístundastarfi, metnaðarfulla innleiðingu á gæðaviðmiðum og miðlun á starfi sínu innan sem utan Hveragerðis.
Frístundamiðstöðin Bungubrekka heldur utan um skipulagt frístundastarf í sveitarfélaginu. Þar má nefna frístundaheimili, félagsmiðstöð, ungmennastarf og ungmennaráð, rafíþróttastarf, sumarstarf barna og unglinga, vinnuskóla og núna Félag eldri borgara í Hveragerði. Allt starfsfólk Bungubrekku getur starfað þvert á allt starfið og tekið þátt í verkefnum, undirbúning, viðburðum og öllu öðru sem snýr að því starfi sem tilheyri frístundamiðstöðinni. Stjórn Félag eldri borgara í Hveragerði hefur haldið fundi með forstöðumanni frístundamiðstöðvarinnar og starfsfólki um margs konar samstarf til hagsbóta fyrir bæði yngri og eldri Hvergerðinga. Við erum öll mjög ánægð með þessa spennandi lausn og sjáum fyrir okkur margs konar möguleika og verkefni til að styrkja allt félagsstarf í bænum. Þann 6. desember var haldinn jólafundur Félags eldri borgara á Hótel Örk þar sem 90 manns hlýddu á kynningu á þessu samstarfi sem er farið af stað. Margir lýstu yfir mikilli ánægju með þetta fyrirkomulag.

F.h. Félags eldri borgara Hveragerði

Sigurlín Sveinbjarnardóttir

Myndir frá jólafundi 6. desember.  ljósm: Bjarni Björnsson